Los productos
Los productos
Os produtos
Los productos
Berberechos
O berberecho conforma outro dos selos de identidade do municipio de Vilanova de Arousa. As súas características nutricionais convérteno nun produto de referencia para levar unha dieta sa e equilibrada.
O marisqueo do berberecho conta cunha longa tradición na localidade. Non en balde, unha das estampas típicas que che podes atopar son as praias cheas de mariscadoras de a pé recollendo de modo manual estes prezados bivalvos. Un traballo sacrificado para colleitar un marisco moi prezado na gastronomía galega.
Historia do cultivo del berberecho
A tradición marisqueira mantívose durante xeracións en Vilanova de Arousa. A pesca artesanal segue sendo a base do traballo desenvolvido polas mariscadoras de a pé que enchen as praias da localidade vilanovesa para recoller este prezado bivalvo.
Para poder extraelo de entre os lodos areosos a pé de costa, utilízanse os rastros ou raños; unha especie de anciños con forma bombeada, que se enterran na area para capturar os berberechos. A separación dos radios destes apeiros está especificamente pensada para que as especies que se pesquen (ou que queden no rastro despois de sacudir os restos de area) cumpran co tamaño mínimo de comercialización.
Ademais do marisqueo a pé -o máis típico na zona- tamén se dá o marisqueo de a flote. Este termo refírese á pesca do berberecho desde pequenas embarcacións localizadas preto da beira do mar.
Unha vez recollido o produto, trasládase á lonxa onde se realizará a pertinente clasificación por tamaños para despois pasalo pola depuradora, garantindo que os bivalvos cumpran con todas as normativas sanitarias para o seu consumo. Establécense tres categorías: Berberecho de 1ª (o de maior tamaño), de 2ª (mediano) e de 3ª (pequeno). En función do seu tamaño e da demanda por parte das empresas compradoras e comercializadoras establecerase o prezo de venda en lonxa.
Características do berberecho
O berberecho é un bivalvo de forma ovalada e bombeada. As súas valvas mostran forma de corazón, polo que se lle chegou a denominar corazón comestible (Cardium edule). A súa superficie destaca polas súas estrías, contando cunha media de entre 22 e 28 costelas (ou surcos radiais) que son atravesadas de modo perpendicular por varias liñas concéntricas moi finas. Deste xeito, mostra unha aparencia como dunha especie de tellado. A cor da cuncha pode variar desde o marrón escuro ao branco. O seu interior está composto por unha vianda de cor branca, con tons beixe.
Esta especie vive nos fondos lodoso e de area fina próximos á costa. Contan cunha gran capacidade de adaptarse aos cambios nas condicións ambientais, aguantando condicións moi duras, con bruscas modificacións de salinidade ou de temperatura do mar. Os berberechos aliméntanse pola filtración de organismos vivos, polo que as augas da Ría de Arousa, moi alta en fitoplancto, resultan idóneas para o seu adecuado desenvolvemento.
Nutricionalmente falando, o berberecho destaca por un baixo contido en graxa -con pouca achega calórica- e moi rico en proteínas, vitaminas e sales minerais. Entre elas, destacan a A, a B3, ademais de ferro, iodo, zinc, sodio e potasio.
Como podes comprobar, o berberecho é un alimento ideal para levar unha dieta sa e equilibrada. Pódelo consumir tanto fresco como en conserva -ao natural, ou en distintas preparacións-. O seu tamaño mínimo de comercialización é de 25 mm de lonxitude.